*** فين البرقع ***
قالوا زمان اللي اختشى مات
وقت ما كان تقاليد وعادات
وزينة الست حياء وكسوف
وممنوع تظهر علي البهوات
برقع نازل حافظ الصورة
ما تبان منه حتى القورة
وفستان واسع ييجي مترين
يحفظ كل جميلة أمورة
وإيد ما تسلم حتى قريب
ولا تظهر لو جالها خطيب
أصل دا عرف ما بين الناس
مهما كان برضه هو غريب
شوفوا دلوقتي بقينا فين
شعر ومصفوف ع الجانبين
وألوان مالية وش الهانم
بتداري بيها غراب البين
مش بتكلم علي الزينة
الزينة جوه البيت يا رزينة
تسعدي بيها أبو العيال
مش عروسة في البترينة
وزيد في الطينة ييجي قنطار
جينز مقطع كله عوار
وعيون باصة للحم رخيص
خلوا عيشتنا تبقى مرار
كل غريب أصبح قريب
أما صديق أو حتى حبيب
ولا يشغلها كلام الناس
ولا تعرفش كلمة عيب
تسهر بره لنص الليل
وتشرب زفت يهد الحيل
ويا عقول تائهة وسكرانة
وأخر السكة تلاقي الويل
قولوا لي إزاي دى تربي أجيال
وتكون قدوة في الأفعال
وهي بذاتها عقلها غايب
وبكره ياما تشوف أهوال
كلمة بقولها وكلي إيمان
نرجع فينا طبع زمان
وبلاش موضة وفعل ذميم
ونكون لعبة في إيد شيطان
أوعوا تقولوا دي رجعية
افكار بالية وخيبة قوية
حكمة قالوها أجدادنا زمان
بنت الحرة تبقى أبية
***********************
بقلم / مصطفى كرم
تعليقات
إرسال تعليق